GRANDEZZA

ernscht häter gheisse,
ernesto sich gnänt,
parmal scho
ischer im fernse cho,
sitdo ischer prominänt.
woner anechunt,
zieter alli blick ufsich,
debi ischer kein popstar
und schogarnöd rich, schogarnöd rich.  

sis gheimnis heisst grandezza, grandezza

er hät konkurs gmacht,
isch chnocheschtier,
hockt dihei ide chelti,
isst nume gschwellti
und trinkt höchschtens mal es pier.
doch wänn öpis wichtigs lauft,
chunter als v. i. p.,
a jedere prömiäre
fahrter im rollls royce i, im rolls royce i.

sis gheimnis heisst grandezza, grandezza,
vo züri bis ibiza, ibiza.

öber ufere bananeschale usrutscht, im tram bim schwarzfahre oder im coop bime chline ladediebstahl verwütscht wird, er reagiert mit grandezza:
“was, zwei fläsche boschole! die müendmer us versee irgendwie vom regal obenabe idie täsche ine gheit si! wüssed sie, so billige wi suffich doch gar nöd, sie chönds wider zrug is regal tue, merci!”

drum, wänn nöd de hellscht bisch,
nöd attraktiv,
weder künschtlerisch
no im schport begabt,
und aunöd kreativ,
gschäftlich häschder dfinger
auschomal verbrännt,
und für öpis anders
häsch eifach kei talänt, häsch kei talänt:

probiers mal mit grandezza, grandezza,
wirsch xe, mit ebizli grandezza, grandezza
chunsch vo züri bis ibiza, ibiza,
chunsch eifach besser, chunsch eifach besser,
chunsch eifach bessera.

sallerwichtigscht isch: e wichtigi bire risse. und dänn, wänndi a sonere vip-party zuefelligerwis öper söti fröge: ”wie finded si de nöi marthaler?” seisch eifach nöd: “wer isch das?”, sondern: “jedi xellschaft brucht es korrektiv. und wämmer wäge 20 milliönli sones büro ufmacht, muemer ufpasse, dass sich de kulturfaschismus nöd sälber kapitalisiert, das wär enintegrativi kataschtrofe für öisi kultur und entspricht de allgemeine politische verdrängigsmethodik idem land.” und fallsder das nöd chasch merke, seisch eifach: “suboptimal!”

probiers mal mit grandezza, grandezza,
wirsch xe, mit ebizli grandezza, grandezza
chunsch vo züri bis ibiza, ibiza,
chunsch eifach besser, chunsch eifach besser,
chunsch eifach bessera.

 

« zurück